منتديات حلا العرب منكم واليكم


أهلا وسهلا بك زائرنا الكريم, أنت لم تقم بتسجيل الدخول بعد! يشرفنا أن تقوم بالدخول أو التسجيل إذا رغبت بالمشاركة في المنتدى

يوميات_جدتى_1

استعرض الموضوع السابق استعرض الموضوع التالي اذهب الى الأسفل  رسالة [صفحة 1 من اصل 1]

1اطلع على اخر مساهمه يوميات_جدتى_1 في الخميس سبتمبر 22, 2016 3:57 am


#يوميات_جدتى_1
عادل .. عاااااااااااااااااادل ..
يتقلب في فراشه و يرفع رأسه ..
- " يا فتاح يا عليم يا رزاق يا كريم " .. !
ينفتح باب الغرفة و تدخل سيدة مسنة .. فيتظاهر انه نائم بعمق ..
- " اوم اصحى يا وله عشان تروح المدرسة " ..
لا يرد ..
- " اوم يا ابن الـ....... انا عارفة انك صاحي .. يا وله اوم .. طيب يا رب تروح المدرسة متأخر و تتمد على رجليك " ..
ينفض الأغطية من عليه بعنف و ينظر لها بغيظ مكتوم ..
- " تعالى خدلك قلمين يا وله .. يامه .. خوفت انا كده .. انت بتزغرلي كده ليه ؟ " ..
- " يا ستي حرام عليكي .. و الله العظيم انا في الجامعة .. و المصحف الشريف انا في الجامعة " ..
- " جامعة جامعة ياخويا و انا مالي ماهي مصلحتك .. خليك انت كده نايم لحد ما يجيلك قرحة من كتر الرقدة " ..
يحك رأسه و ينظر لها .. و برغمه ترتسم ابتسامة على شفتيه ..
- " انزل هات لنا عيش مفيش ولا رغيف في البيت " ..
و في ثوان تختفي الأبتسامة من على وجهه ..
يخرج من باب العمارة و هو يغني ..
يلتقي بأحد جيرانه امام المنزل فيقف يتحدث معه بشأن مباراة ما ..
و فجأة .. يسقط امام وجهه قطعه حساسة من ملابسة ..
يرفع عينه الى الشرفة ليجد جدته تقوم بنشر الغسيل ..
- " واد يا ( عادل ) .. ناولنى الـ ( ...... ) بتاعك عشان وقع مني " ..
- " لا يا شيخة " ..
- " و هات فول "
يلتفت لجاره في خجل ليجده يضحك في هيستيريا .. !
*
يجلسان يتناولان الافطار .. يمد يده في طبق الفول فتضحك هي في انتصار ..
- " عاجبك الفول ؟ " ..
- " يا ستي انا جايبه جاهز من المطعم .. انتي يا دوب قلبتيه بس " .. !
- " يعني انا كذابه يا وله ؟ " ..
- " لاء يا ستي انا اللي كذاب " ..
تناولا الافطار و خرج هو للقاء اصدقاءه و جلست هي امام التلفاز ..
- " شوف ياختي البنات و مياعتهم " ..
تغير القناة و تتعجب اكثر .. الى ان تستقر على قناة تعرض مسلسلاً ما ..
- " يا لهوي .. يخيبك راجل .. اللي بتعمله ده هيقعدلك في عينك و في عافيتك "
و تفاعلت اكثر مع المسلسل و علا صوتها و هي تسب البطل .. !
و فجأة .. نشرة الأخبار ..
( الثوار يملأون ميدان التحرير مطالبين ............... )
اندهشت من الخبر الغريب .. اي ثوار .. و اين يقع ميدان التحرير هذا .. ؟
قررت ان تسأل ( عادل ) .. لكن اين ( عادل ) .. ؟
لماذا تأخر .. ؟
- " سلام عليكم " ..
قالها فأنتفضت في فزع .. و نظرت له بغيظ و غل .. ثم تناولت عصا رفيعة ..
- " انت ملكش غير الخرزانة يابن الـ........ كنت فين كل ده " ..
- " كل ده ايه يا ستي الساعة لسه مجتش 7 " ..
تنظر الى ساعة الحائط و يشرق وجهها ..
- " تصدق صح .. طيب يا ضنايا معلش " ..
يبتسم و يذهب لغرفته لتغيير ملابسه ..
و بينما هو يفعل سمع صوتها تسأله عما يفعله الناس في التحرير ..
- " يا ستي الناس دول عاوزين يشيلو الريس " ..
- " يشيلوه يودوه فين ؟ " ..
- " يا ستي لاء اقصد يعني عاوزينه يسيب الحكم .. دا في ناس ماتت .. شباب صغيرين و ناس كبار رجالة و ستات " ..
و فتح الجريدة فرأت صور لبعض من شهداء الثورة ..
- " يا حرقة قلب امهم " ..
ثم رفعت العصا مرة اخرى و طاردته في ارجاء الشقة ..
- " حسك عينك اعرف انك خطيت هناك يابن الـ ......... و على الله تتأخر برة البيت تاني .. انت

عندك مدرسة الصبح " .. !

معاينة صفحة البيانات الشخصي للعضو

استعرض الموضوع السابق استعرض الموضوع التالي الرجوع الى أعلى الصفحة  رسالة [صفحة 1 من اصل 1]

صلاحيات هذا المنتدى:
لاتستطيع الرد على المواضيع في هذا المنتدى